अपहरण झालेल्या युवकाची सुपा पोलिसांकडून थरारक सुटका
चार तासांच्या शर्थीच्या प्रयत्नांनंतर आरोपींच्या तावडीतून युवकाची मुक्तता; दोन आरोपींना अटक
स्टारयुग लाईव्ह. : मोरगाव
बारामती तालुक्यातील सुपा पोलिसांनी अपहरण झालेल्या एका युवकाची अवघ्या चार तासांच्या शर्थीच्या प्रयत्नांनंतर सुखरूप सुटका करत उल्लेखनीय कामगिरी बजावली आहे. आरोपींच्या पत्नीसोबत संबंध असल्याच्या संशयातून युवकाचे अपहरण करण्यात आल्याचे प्राथमिक तपासात समोर आले असून, या प्रकरणी बारामतीतील दोन तरुणांना अटक करण्यात आली आहे. या धाडसी कारवाईमुळे सुपा पोलिसांच्या कामगिरीचे सर्वत्र कौतुक होत आहे.
मिळालेल्या माहितीनुसार, संबंधित युवकाचे काही व्यक्तींशी पूर्वीपासून परिचयाचे संबंध होते. आरोपींना त्यांच्या पत्नीसोबत युवकाचे अनैतिक संबंध असल्याचा संशय होता. याच संशयातून त्यांनी युवकाला जबरदस्तीने वाहनात बसवून अपहरण केल्याची माहिती समोर आली आहे.
घटनेची माहिती मिळताच सुपा पोलिसांनी तातडीने तपासाची चक्रे फिरवली. अपहरण झालेल्या युवकाचा शोध घेण्यासाठी विविध पथके तयार करण्यात आली. तांत्रिक माहिती, मोबाईल लोकेशन आणि स्थानिक सूत्रांच्या मदतीने पोलिसांनी आरोपींचा माग काढला.
सुमारे चार तास सुरू असलेल्या शोधमोहीमेत पोलिसांनी आरोपींचा पाठलाग करत त्यांना गाठले. त्यानंतर युवकाची सुखरूप सुटका करण्यात आली. या कारवाईदरम्यान दोन्ही आरोपींना ताब्यात घेण्यात आले असून त्यांच्याविरुद्ध अपहरणासह विविध कलमान्वये गुन्हा दाखल करण्यात आला आहे.
युवकाला कोणतीही गंभीर दुखापत झाली नसल्याची माहिती पोलिसांकडून देण्यात आली. तसेच या प्रकरणामागील नेमके कारण, आरोपींची भूमिका आणि इतर कोणाचा सहभाग आहे का याचा सखोल तपास सुरू आहे.
सुपा पोलिसांनी दाखविलेली तत्परता, तांत्रिक तपासाचा प्रभावी वापर आणि अवघ्या काही तासांत युवकाची सुटका केल्याने नागरिकांमधून समाधान व्यक्त करण्यात येत आहे. अपहरणासारख्या गंभीर गुन्ह्याचा जलद उलगडा करून युवकाला सुरक्षितपणे कुटुंबीयांच्या स्वाधीन केल्याबद्दल पोलिस अधिकारी व कर्मचाऱ्यांवर अभिनंदनाचा वर्षाव होत आहे.
या कारवाईमुळे गुन्हेगारांमध्ये धाक निर्माण झाला असून कायदा हातात घेणाऱ्यांविरुद्ध कठोर कारवाई केली जाईल, असा स्पष्ट संदेश सुपा पोलिसांनी दिला आहे.
