लोणी भापकरमध्ये शाळकरी विद्यार्थिनीच्या अपहरणाचा प्रयत्न; धाडसाने सुटका, पालकांमध्ये भीतीचे वातावरण.
स्टारयुग लाईव्ह : मोरगाव
बारामती तालुक्यातील लोणी भापकर येथे शाळेत सायकलवरून जात असलेल्या १३ वर्षीय विद्यार्थिनीचे जबरदस्तीने अपहरण करण्याचा प्रयत्न झाल्याची धक्कादायक घटना उघडकीस आली आहे. या घटनेमुळे परिसरातील पालकांमध्ये भीतीचे वातावरण निर्माण झाले असून शालेय विद्यार्थ्यांच्या सुरक्षेचा प्रश्न पुन्हा ऐरणीवर आला आहे. या प्रकरणी वडगाव निंबाळकर पोलीस ठाण्यात अनोळखी चार इसमांविरुद्ध भारतीय न्याय संहिता (BNS) कलम 137(2) व 62 अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, सोमवार (दि. 20 जुलै) रोजी सकाळी सुमारे 10 वाजण्याच्या सुमारास संबंधित १३ वर्षीय विद्यार्थिनी नेहमीप्रमाणे सायकलवरून शाळेकडे जात होती. दरम्यान, लोणी भापकर येथील प्रसिद्ध दत्त मंदिराजवळ रस्त्याच्या कडेला राखाडी रंगाचे विको वाहन उभे होते.
या वाहनातील चार संशयितांपैकी तीन जणांनी विद्यार्थिनीची सायकल अडवून तिला जबरदस्तीने वाहनात बसवण्याचा प्रयत्न केल्याचा आरोप तक्रारीत करण्यात आला आहे.
विद्यार्थिनीचे धाडस ठरले जीव वाचवणारे
अचानक घडलेल्या या प्रकारामुळे विद्यार्थिनी घाबरली असली तरी तिने प्रसंगावधान राखत धाडसाने प्रतिकार केला. संशयितांच्या तावडीतून स्वतःची सुटका करून ती तेथून पळून गेली आणि थेट घरी जाऊन घडलेला सर्व प्रकार पालकांना सांगितला. त्यानंतर पालकांनी तातडीने वडगाव निंबाळकर पोलिसांकडे धाव घेत तक्रार दाखल केली.
गुन्हा दाखल; पोलिसांकडून तपास सुरू
या प्रकरणी गुन्हा रजिस्टर क्रमांक 14/2026 नुसार अनोळखी चार इसमांविरुद्ध गुन्हा दाखल करण्यात आला आहे. पोलीस नाईक भाऊसाहेब मरकड (बकल क्रमांक 960) हे या घटनेचा पुढील तपास करत आहेत. परिसरातील सीसीटीव्ही फुटेज, वाहनाचा मागोवा तसेच संशयितांची ओळख पटविण्याचे काम सुरू असल्याची माहिती मिळाली आहे.
स्थानिक नागरिकांच्या माहितीनुसार, लोणी भापकर येथील दत्त मंदिर परिसरात गेल्या वर्षभरात आणखी तीन शालेय विद्यार्थ्यांना जबरदस्तीने वाहनात बसवण्याचा प्रयत्न झाल्याच्या घटना समोर आल्या होत्या. मात्र त्या घटनांबाबत अधिकृत पोलीस तक्रार दाखल झाली होती की नाही, याबाबत स्पष्ट माहिती उपलब्ध नाही. त्यामुळे या परिसरात मुलांच्या सुरक्षेबाबत गंभीर प्रश्न उपस्थित होत आहेत.
पोलिसांचे नागरिकांना आवाहन
या घटनेतील संशयित व्यक्ती किंवा राखाडी रंगाच्या विको वाहनाबाबत कोणालाही कोणतीही माहिती असल्यास ती तात्काळ वडगाव निंबाळकर पोलिसांना कळवावी, असे आवाहन पोलिसांनी केले आहे. नागरिकांनी अफवा पसरवू नयेत, मात्र संशयास्पद हालचाली दिसल्यास त्वरित पोलिसांना माहिती द्यावी, असेही पोलिसांनी सांगितले आहे.
पालकांमध्ये भीतीचे वातावरण
या धक्कादायक घटनेनंतर परिसरातील पालकांमध्ये भीतीचे वातावरण पसरले आहे. शाळकरी मुलींच्या सुरक्षेसाठी शाळांच्या परिसरात आणि मुख्य रस्त्यांवर पोलीस गस्त वाढविण्याची, सीसीटीव्ही व्यवस्था मजबूत करण्याची तसेच शाळा सुटण्याच्या वेळेत विशेष सुरक्षा व्यवस्था ठेवण्याची मागणी पालकांकडून होत आहे.
दरम्यान, या घटनेमुळे बारामती तालुक्यात शालेय विद्यार्थ्यांच्या सुरक्षेचा मुद्दा पुन्हा एकदा ऐरणीवर आला असून, संशयितांना तातडीने अटक करून अशा घटनांना आळा घालण्याची मागणी नागरिकांकडून जोर धरत आहे.
